Bestu hljóðbækur ársins verðlaunaðar!
Mikil stemming var á Parliament hótelinu þriðjudaginn 17. mars þegar Íslensku hljóðbókaverðlaunin voru veitt við hátíðlega athöfn í sjöunda sinn. Meðal sigurvegara var hinn ungi og efnilegi rithöfundur Embla Bachmann, Glæpadrottning Satu Rämö auk þess sem leikarinn Bjarni Snæbjörnsson hlaut verðlaun fyrir sjálfsævisögu sína Mennsku.
Verðlaunin hafa verið veitt árlega frá árinu 2020 og eru orðinn fastur hápunktur íslensks hljóðbókaárs. Þar komu saman höfundar, lesarar, útgefendur og aðrir aðstandendur bókmennta til að fagna framúrskarandi hljóðbókaútgáfu síðasta árs. Veitt voru verðlaun í fimm flokkum auk sérstakra heiðursverðlauna.
Þúsundir hlustenda tóku þátt í almenningskosningu í janúar þar sem valdar voru tilnefningar til verðlaunanna. Að því loknu voru tilnefndar bækur metnar af fagdómnefndum. Dómnefndirnar eru skipaðar rithöfundum, lesurum og fagfólki í umfjöllun um bókmenntir og menningu.
Í dómnefndum sátu:
Fyrir skáldsögur, ljúflestur og rómantík: Þórunn Erna Clausen, Rebekka Sif Stefánsdóttir og Unnur Birna Backman
Fyrir óskáldað efni og glæpa- og spennusögur: Ingibjörg Iða Auðunardóttir, Vera Illugadóttir og Kristján Franklín Magnús
Fyrir börn og ungmenni: Jóhann Sigurðarson, Símon Birgisson og Sigrún Elíasdóttir
Dómnefndir höfðu það að leiðarljósi að líta heildstætt á hvert verk þar sem vandaður lestur á góðu ritverki getur bætt miklu við upplifun lesandans. Því voru ekki aðeins rithöfundar verðlaunaðir heldur einnig lesarar hljóðbókanna.
Verðlaunahafar Íslensku hljóðbókaverðlaunanna 2026 eru eftirfarandi:
Besta barna- og ungmennabókin: Kærókeppnin
Höfundur: Embla Bachmann
Lestur: Embla Bachmann og Mikael Kaaber
Útgefandi: Bókabeitan
Í umsögn dómnefndar segir: „Kærókeppnin er frumleg, stórskemmtileg og fyndin saga sem rígheldur lesanda frá upphafi til enda og forðast listilega að lenda í gryfjum hefðbundinna klisja unglingabóka. Lesararnir tveir koma mismunandi sjónarhornum aðalpersónanna vel til skila í lifandi og blæbrigðaríkum lestri. Að hafa unga lesara að lesa fyrir unglinga eykur trúverðugleika sögunnar og nýtir möguleika hljóðbókaformsins vel.“
Besta óskáldaða efni: Mennska
Höfundur og lesari: Bjarni Snæbjörnsson
Útgefandi: Forlagið
Í umsögn dómnefndar segir: „Í Mennsku segir Bjarni Snæbjörnsson af hispursleysi frá uppvexti sínum sem samkynhneigður maður í smábæ á Vestfjörðum, frá leið sinni út úr skápnum og glímunni við ótta og skömm á þeirri vegferð. Bókin er á köflum átakanleg en einnig meinfyndin, og gefur góða innsýn í þá innri og ytri baráttu sem margt hinsegin fólk hefur þurft að eiga í til að komast í sátt við sjálft sig og samfélagið. Höfundur les bókina sjálfur af leikni og einlægni, sem hentar vel svo persónulegri frásögn, og hlustendur hrífast með sorgum Bjarna og sigrum.“
Besta skáldsagan: Viðkomustaðir
Höfundur: Ásdís Ingólfsdóttir
Lestur: Valý Þorsteinsdóttir
Útgefandi: Storyside / Sæmundur
Í umsögn dómnefndar segir: „Viðkomustaðir er hrífandi og áhrifamikil skáldsaga um unga stúlku sem hrekst frá Íslandi alla leiðina í Vesturheim. Hún berst í gegnum erfiða tíma með þrautseigju og bjartsýni. Viðfeðmi karaktera og efnistaka gefur manni góða innsýn í þá miklu breytingar sem fylgdu því að flytja til Vesturheims. Frásögnin er einlæg og situr eftir í huga þess sem hlustar. Björt og falleg rödd Valýar Þórsteinsdóttur hentar sögunni einstaklega vel og er laus við óþarfa tilþrif. Átakanleg saga eins og Viðkomustaðir þarfnast ákveðins viðnáms sem jafnar hana út sem Valý gerir snilldarlega.“
Besta rómantík og ljúflestrarbók: Fiðrildaherbergið
Höfundur: Lucinda Riley
Lestur: Álfrún Helga Örnólfsdóttir
Þýðing: Valgerður Bjarnadóttir
Útgefandi: Benedikt bókaútgáfa
Í umsögn dómnefndar segir: „Fiðrildaherbergið er margradda örlagasaga um Pósu og fjölskyldu hennar á Austur-Englandi. Efnistökin eru spennandi og áhugaverð og höfundur kemur tíðarandanum um miðja tuttugustu öld í Bretlandi vel til skila. Lestur Álfrúnar Örnólfsdóttur er óaðfinnanlegur og hentar bók sem þessari gífurlega vel. Bæði flæði og skýrleiki er til fyrirmyndar og innlifunin rétt tímasett. Lesturinn glæðir bókina lífi og heldur athygli þess sem hlustar.“
Besta glæpa- og spennusagan: Hildur
Höfundur: Satu Rämö
Lestur: Sigríður Eyrún Friðriksdóttir
Þýðing:Erla Elíasdóttir Völudóttir
Útgefandi: Forlagið
Í umsögn dómnefndar segir: „Satu Rämö kveður sér hljóðs í heimi norrænna glæpasagna með titilpersónunni Hildi og kemur um leið Ísafirði á kortið sem litlum morðbæ á hjara veraldar. Með skemmtilegri og hlýrri persónusköpun og áhugaverðri fléttu fortíðar og nútíðar að vopni tekst höfundi að skapa trúverðugan sagnaheim sem situr eftir hjá lesandanum. Lestur Sigríðar Eyrúnar Friðriksdóttur glæðir söguna lífi og hrífur fólk með sér alla leið á Vestfirði í morðráðgátu þar sem engin leið er að giska á hver morðinginn er.“
Bjarni Fritzson hlaut sérstök heiðursverðlaun
Heiðursverðlaun Íslensku hljóðbókaverðlaunanna 2026 hlaut rithöfundurinn, sálfræðingurinn og fyrirlesarinn Bjarni Fritzson. Þau fær hann fyrir ómetanlegt starf við fræðslu barna og ungmenna og framlag sitt til barnabókmennta. Þá hefur hann með námskeiðum, fyrirlestrum og skemmtilegum sögum aukið lestraráhuga og stuðlað að sjálfstyrkingu barna og ungmenna.
Bjarni er höfundur vinsælla sjálfstyrkingarbóka fyrir börn og bókaseríunnar um Orra óstöðvandi og Sölku, sem notið hafa mikilla vinsælda og trónað á topplistum. Í bókum sínum sameinar hann frásagnargleði, sálfræði og fræðslu á aðgengilegan hátt og talar beint inn í heim barna, sérstaklega drengja, án þess að útiloka aðra lesendur.
Með sögum sínum hefur Bjarni stuðlað að auknum lestraráhuga barna sem annars tengja sig síður við hefðbundið lesefni. Í verkum hans eru tilfinningar, hugrekki og vinátta í forgrunni og lesturinn verður að spennandi ævintýri sem styrkir sjálfsmynd og sjálfstraust ungs fólks.
Bjarni er með B.S. gráðu í sálfræði og framhaldsmenntun í félags- og vinnusálfræði og jákvæðri sálfræði. Hann er jafnframt eigandi sjálfstyrkingarfyrirtækisins Út fyrir kassann, þar sem hann heldur námskeið og fyrirlestra fyrir börn, ungmenni og foreldra. Með starfi sínu hefur hann haft áhrif langt út fyrir blaðsíður bókanna og hvatt ungt fólk til sjálfstrausts og jákvæðrar sjálfsmyndar.
Kristín Tómasdóttir afhenti Bjarna heiðursverðlaunin fyrir þetta ómetanlega framlag til að efla ungt fólk með sögum og fræðslu.
Nánari upplýsingar má finna á heimasíðu verðlaunanna
Nýjustu fréttir
Tilnefningar til íslensku hljóðbókaverðlaunanna 2026
Hér má sjá þær 25 hljóðbækur sem hljóta tilnefningu til Íslensku hljóðbókaverðlaunanna Storytel Awards 2026. Verðlaunin eru veitt í fimm flokkum og fimm hljóðbækur eru tilnefndar í hverjum flokki: börn og ungmenni, glæpa og spennusögur, skáldsögur, ljúflestur og rómantík og óskáldað efni.
Kosning hafin fyrir Íslensku hljóðbókaverðlaunin - Veldu bestu hljóðbækur ársins!
Nú hefur almenningur tækifæri til að kjósa sína eftirlætis hljóðbók í forvali fyrir Íslensku hljóðbókaverðlaunin – árlega uppskeruhátíð sem heiðrar höfunda og lesara framúrskarandi íslenskra hljóðbóka frá liðnu ári.
Söguáskorun Storytel: Bók fyrir ungmenni, skrifuð af ungmenni.
Nú á nýju ári ætlar Storytel að standa fyrir nýrri söguáskorun fyrir krakka á aldrinum 12-17 ára. Markmiðið er að hvetja sem flesta til að skapa og skrifa eigin sögur. Áskorunin er frábært tækifæri fyrir unga höfunda til að þróa hugmynd í heilsteypta sögu og eiga möguleika á að sjá hana verða að útgefnu verki, bæði sem rafbók og hljóðbók. Öllum krökkum á aldrinum 12-17 er velkomið að taka þátt en skilafrestur er til og með 15. mars næstkomandi.
Upplestur á aðventunni
Á aðventunni styrkti Storytel nokkur dvalar- og hjúkrunarheimili aldraðra til að greiða rithöfundum fyrir að koma og lesa fyrir íbúana. Mikil eftirspurn var eftir því að fá upplestur og góður rómur gerður að verkefninu hjá íbúum sem eru að sögn starfsfólks margir duglegir að lesa eða hlusta á bækur. Upplestur bóka fyrir ýmsa hópa fólks er ríkur þáttur í íslenskri bókmenntahefð og viljum við leggja okkar af mörkum við að halda í þessa fallegu íslensku hefð, efla hana og tryggja að hún nái til fleiri, ekki síst þeirra sem hafa takmarkaðri aðgang að menningarviðburðum. Á meðfylgjandi mynd má sjá þegar Dagur Hjartarson rithöfundur heimsótti hjúkrunarheimilið Droplaugarstaði 16. desember sl. og las úr nýútkominni bók sinni Frumbyrjur, sem vakti mikla lukku meðal dvalargesta og starfmanna.
Hlustaðu og lestu á sama tíma! Nýr eiginleiki í appinu
Storytel hefur opnað nýjan möguleika fyrir íslenska lesendur sem felst í því að geta lesið texta rafbókar og hlustað á hljóðbók samtímis. Lengi hefur verið kallað eftir þessum möguleika hér á landi en hann getur hjálpað fólki að halda athygli og dýpka lesskilning og er mikilvægur fyrir þá sem eiga erfitt með lestur.
Persónuleg saga Birgittu H. Halldórsdóttur um ást, sorg og von
Með nýjustu bók sinni, Síðan hittumst við aftur, slær rithöfundurinn og bóndinn Birgitta H. Halldórsdóttir nýjan streng, persónulegan og einlægan tón sem nær djúpt til allra sem hlusta. Í bókinni opnar hún hjarta sitt og miðlar reynslu sinni af ást, missi og leiðinni í gegnum sorgina eftir skyndilegt áfall.
Sígildir sveitarómansar Ingibjargar Sigurðardóttur koma út á Storytel
Í tilefni þess að rithöfundurinn Ingibjörg Sigurðardóttir hefði orðið 100 ára sunnudaginn 17. ágúst, kemur skáldsaga hennar, Ást og hatur út í hljóðbókarformi á Storytel.
Símon segir. Ný glæpasaga frá Önnu Margréti Sigurðardóttur.
Símon segir eftir Önnu Margréti Sigurðardóttur er spennandi íslensk glæpasaga. Þetta er fjórða bókin í vinsæla bókaflokknum um rannsóknarlögregluteymið Bergþóru og Jakob. Áður hafa komið út bækurnar Hringferðin, Örvænting og Öskrið.
Hvað gerist þegar nýskilin miðaldra kona með stórt skap arkar ákveðin út á stefnumótamarkað 21. aldarinnar?
Dagbók miðaldra unglings eftir Sigrúnu Elíasdóttur er gamansöm skáldsaga um blákaldan veruleika konu sem þarf að finna sig á nýjan leik. Sigrún er einna helst þekkt fyrir ljúflestrarbækurnar um Eyrarvík og hlaðvarpið Myrka Ísland, þar sem skuggahliðar Íslandssögunnar eru skoðaðar.
Ný glæpasaga Hugrúnar Björnsdóttur: Uns dauðinn aðskilur okkur.
Uns dauðinn aðskilur okkur er önnur bók Hugrúnar Björnsdóttur um réttarsálfræðinginn Kamillu Brim. Kamilla stendur frammi fyrir flóknu máli. Ungur maður kærir konu fyrir kynferðisbrot og samband þeirra reynist flóknara en virðist við fyrstu sýn.
Steindór Ívarsson snýr aftur með áhrifamikla örlagasögu
Steindór snýr nú aftur með nýja bók á Storytel, að þessu sinni örlagasögu sem dregur upp áhrifamikla mynd af lífum tveggja kvenna sem tvinnast saman á óvæntan hátt. Bókin ber titilinn Sálarstríð og er falleg, dramatísk og mannleg saga þar sem upp koma leyndarmál sem fylgja fólki út lífið. Þetta er saga um tengsl, brot, endurkomu og endurlausn. Steindór bregður hér upp sterkum kvenpersónum sem fá að blómstra í miðju sögunnar, hver með sína sögu, en saman verður úr því áhrifarík heild sem lætur engan ósnortinn.
Sögur fyrir páskafríið
Páskarnir eru fríið þar sem það er fullkomlega í lagi að gera ekkert. Dagarnir verða aðeins lengri, kaffibollinn aðeins notalegri – og þú færð loksins smá stund fyrir þig. Hvort sem þú ætlar að slaka á heima, fara í bústað eða njóta páskana með fjölskyldunni, þá er fátt betra en góð saga með súkkulaðinu. Hér eru sögur á Storytel sem henta fullkomlega í páskastemmningu – allt frá spennandi glæpasögum, grípandi sönnum sögum, hjartnæmum skáldsögum og ævintýrum fyrir börnin. Þú þarft bara að finna þína sögu, hlusta, og njóta.
Konur áttu sviðið á Íslensku hljóðbókaverðlaununum
Mikil kvenorka var á Nasa þegar Íslensku hljóðbókaverðlaunin - Storytel Awards voru afhent, en í fyrsta sinn voru allir verðlaunahöfundar, verðlaunalesarar og heiðursverðlaunahafar konur Verðlaunin voru veitt í fimm flokkum: skáldsaga, ljúflestur og rómantík, börn og ungmenni, óskáldað efni og glæpa- og spennusaga.
Tilnefningar til Íslensku hljóðbókaverðlaunanna 2025
25 hljóðbækur hljóta tilnefningu til Íslensku hljóðbókaverðlaunanna - Storytel Awards 2025. Fimm hljóðbækur eru tilnefndar í fimm flokkum, en flokkarnir eru: börn og ungmenni, glæpa-og spennusögur, skáldsögur, ljúflestur og rómantík, og óskáldað efni.
Sögur Birgittu H. Halldórsdóttur hljóta endurnýjun lífdaga á Storytel!
Birgitta H. Halldórsdóttir skipar sér enn á ný í hóp ástsælustu skáldsagnahöfunda Íslands en bækur hennar hafa haldið fjölda lesenda í greipum spennu og losta, ástar og örlaga áratugum saman. Fyrsta bók hennar kom út árið 1983 en bækur hennar hafa verið ófáanlegar í bókabúðum um árabil. Storytel hefur nýverið endurútgefið fjölda bóka Birgittu sem hljóðbækur sem hafa raðað sér efstar á vinsældalista og hlotið gríðarlega góðar viðtökur og umsagnir hlustenda.
